Ël lìber dij Nùmer

Ël quart lìber ëd la Bìbia (Testament Vej, Pentatèuch o Torà) adess a l’é pront ant soa version final arvëdùa. A l’é part ëd l’euvra dla Bìbia an lenga piemontèisa ch’a l’é stàita completà e che già a l’é a disposission an sla Wikisource. A l’é la neuva tradussion soagnà da Paul Castlin-a e Majo Galin-a, ch’i soma adess an camin ëd arvëdde e coreg-ne ij bòro. Ant cost sìt i la podreve lege capitol apress capìtol e fin-a dëscariela tuta an version *.pdf

https://pms.wikisource.org/wiki/La_Bibia_piemont%C3%A8isa/Testament_Vej/Numeri

Introdussion a Nùmer. J’Israelita a rivo ai finagi ‘d Canan, la tèra che Nosgnor a l’avìa anans promëttuje. Ël pòpol ch’a-j va dré a Mosè as arfuda d’intré an col pais përchè a l’han gnun-a fede e a tëmmo j’abitant ëd Canan. Coma ‘n castigh, Nosgnor a-j fa ‘ntlora girulé ant ël desert për quarant’ agn, fin-a tant che cola generassion a dëspariss e na neuva generassion a pija so pòst. Nosgnor Dé a provëdd a so pòpol arviros con lòn ch’a l’han da manca për dzurvive e, a la fin, intré ant la tèra dla promëssa.