Dumìnica ai 5 dë dzèmber 2021 – Sconda dumìnica d’Advent
Letture bibliche: Luca 1:68-79; Malachia 3:1-4; Filippesi 1:3-11; Luca 3:1-6 con le vos ëd Paolo Castellina, Marco Moretti, Massimo Marietta, Anin Ferrero, Gianni Marietta.
Introdussion a le leture bìbliche
La vnùa dël Salvator Gesù Crist a l’era stàita nunsià ‘d manera ciàira dai profeta d’Israel vàire sécoj prima, e peui da l’ùltim dij profeta, Gioann Batista – Batista a l’é pa ‘n nòm ma a veul dì “col ch’a batesa”. Gioann, ch’a vivìa ant ël temp ëd Gesù midem, a stà al sènter ëd nòstre leture bìbliche ‘d costa duminica, comprèis l’evangeli. Ël servissi ch’a l’avrìa rendù Gioann a l’era stàit preanunsià ‘d manera profética fin-a da sò pare, Zacarìa, apress ëd soa nassensa. Costa professia i la trovoma ancheuj ant la prima letura: la càntica ‘d Zacarìa, dal prim capìtol dl’evangeli ‘d Luca. An costa càntica, Zacarìa a làuda la fidelità ‘d Nosgnor Dé a Soe promësse arportà ant le Scriture Sante. Gioann Batìsta a dventa an cole soe paròle ‘l model ëd coj ch’a nunsio che an Crist i l’oma ‘l Salvator ch’a l’avrìa liberane “da la man dij nòstri nemis”. Col ch’a l’é ‘l nemis pì grand che mai nojàutri i podrìo avèj? A l’é ‘l pecà e la mòrt, ch’a n’é la conseguensa ùltima. Ant ël top d’ës mond, ël Crist as dimostra esse la lus, ël ciàir, për guidé ij pass ëd nòstra vita e mnene torna an comunion con Dé. L’anonsi dj’antich profeta a l’é presentane da nòstra sconda letura dal lìber dël profeta Malachìa. Cost profèta a l’avìa nunsià che ‘l Crist a l’avrìa “fàit brusé” la corussion dël pecà ch’a guasta ‘l cheur d l’òm tant da rendlo giust e agradì a j’euj ëd Nosgnor. As trata nen ëd teorìe, coma ch’i vëdoma ant la tersa nòstra letura, anté che l’apòstol Pàul a ringrassia Nosgnor për l’euvra ‘d trasformassion ëd le vite ‘d coj ch’a j’ero fidasse an Gesù ant le sità andova ch’a l’avìa predicà l’Evangeli. Ëdcò nojàutri i soma ciamà a liberess-ne da tuti j’antrap ch’a fan impediment a la pien-a acetassion d l’euvra ‘d grassia ‘d Gesù an nòstra vita e marcé parèj an sla vìa ‘d Nosgnor. L’om-ne mai pensà a chi ch’a vorìa che nojàutri i stèisso lontan da Chiel, e përchè?
Prima letura: Ël càntich ëd Sacarìa, Luca 1:68-79
Ch’a sia benedèt Nosgnor, ël Dé d’Israel, përchè ch’a l’ha visità e liberà Sò pòpol, e përchè a l’ha fane seurte un Salvator potent ant la ca ‘d David, sò servitor. Conforma a lòn ch’a l’avìa nunsià dai temp antich për la boca ‘d Sò sant profeta, ch’i sarìo stàit salvà dai nòstri nemis, da le man ëd tùit coj ch’an veulo mal. Nosgnor a l’ha falo për mostré ai nòstri antich soa misericòrdia e për arcordesse ‘d soa santa aleansa, ël giurament ch’a l’ha fàit a Abraham nòstr pare. Costa aleansa a promet d’acordene che nojàutri, liberà da le man dij nòstri nemis, i Lo servirìo sensa timor, 75con santità e giustissia dë ‘dnans a chiel, për tùit ij nòstri di. E ti, pcita masnà, it saras ciamà ‘l profeta dël Pì-Àut, përché ti ‘t andras dë ‘dnans a Nosgnor për pronteje la stra, e për dé la conossensa dla salvëssa a sò pòpol ant la remission dij sò pecà. Grassie a la bontà misericordiosa ‘d nòstr Dé, la lus matinal dël cel a l’é ‘n camin ch’a seurt d’ìmpit an su nojàutri, për anluminé coj ch’a stan ant ël top e a l’ombra dla mòrt e për guidé ij nòstri pas an sël sënté dla pas”.
Sconda letura: Malachìa 3:1-4
Ël Signor ëd l’univers a dis: “Vardé che ‘v mando mè mëssagé, përchè a pronta na stra ‘dnans ëd mi. E dlongh, a intrerà an sò santuari ‘l Sovran che vojàutri i serche; e ‘l mëssagé dl’aleansa ch’i veule, vardelo ambelessì ch’a riva! Chi é-lo ch’a podrà ‘rzistje ‘l di che chiel a rivà? Chi ch’a podrà sté drit an pé quand ch’as farà vëdde? Përchè chiel a l’é coma ‘l feu dël fondeur e coma la lëssìa dle lavandere. Chiel as na starà com ël fondeur a polidé l’argent. Chiel a farà pur ij dissendent ëd Levi e a-j farà fin coma l’òr e l’argent e lor a saran për Nosgnor coj ch’a smon-o d’oferte degne ‘d chiel. Anlora j’oferte ‘d Giuda e ‘d Gerusalem a saran agradìe da Nosgnor, coma ‘nt ij di antich, coma ‘nt j’époche passà.
Tersa letura: Filipèis 1:3-11
I ringrassio mè Dé tute le vòte ch’i faso mension ëd vojàutri. A l’é sèmper con gòj ch’i prego për tùit vojàutri an minca mia orassion, për càusa ‘d vòstra partessipassion a l’Evangeli dal prim di fin-a a adess. I son sicur ëd sòn: che col ch’a l’ha comensà ‘n voi costa euvra bon-a, a-j darà compiment ant ël Di ëd Crist Gesù. A l’é mach giust ch’i penso parèj ëd tuti voi, përchè i seve an mè cheur, dàit che sia an mie caden-e che ‘nt la difèisa e la confirmassion ëd l’Evangeli, tuti vojàutri i seve dventà mè compagn ant la grassia ‘d Nosgnor. Nosgnor a m’é testimòni coma ch’a l’é përfonda mia afession an Crist Gesù për tuti voi. E i ciamo sta grassia, che vòstr amor a sia sèmper pì grand ant la conossensa e ògni sòrt d’inteligensa parèj ch’ i dësserne lòn ch’a l’é mej e sìe pur e sensa rimpròcc pront për ël Di ‘d Crist, pien dël frut ëd la giustissia ch’a ven da Gesù Crist a la glòria e làude ‘d Nosgnor.
Quarta letura: Luca 3:1-6
Antlora a l’era l’ann ch’a fà quìndes dël règn ëd Tiberio, l’imperator roman; Ponsio Pilàt a l’era governator ëd la Giudèa, Eròd a l’era tetrarca an Galilèa, sò frel Flip, tetrarca ‘nt ël pais d’Iturea e ‘d Tracònita, e Lisènia, tetrarca an Abilena; grand sacerdòt a j’ero Anna e Càifa. An col temp-lì Nosgnor a l’ha adressà soa paròla a Gioann, fieul ëd Zacarìa, ant ël desert. Gioann a përcorìa tuta la region dël Giordan an predicand un batèsim ëd pentiment për la remission dij pecà. Ëd cost Gioann, ël profeta Isaìa a l’avìa bin parlà, quand ch’a l’ha scrivù: “A-i é na vos ch’a crija ‘nt ël desert e ch’a dis: ‘Pronté la stra për la vnùa ‘d Nosgnor, spiané la via ch’a l’ha da passé, ch’a peussa rivé sensa antrap! J’anvalament a saran ampinì; le montagne e le colin-e a saran butà a livel; le vire a saran drissà e ij leugh grognolù a saran sulià. Anlora tuti a vëdran la salvëssa che Nosgnor a l’ha mandà”.
Orassion
Nosgnor ëd misericòrdia! Ch’it l’has mandà ij tò mëssagé, ij profeta, për prediché ‘l pentiment e për pronté la stra për nòstra salvëssa: Dane la grassia dë scoté j’amoniment ch’an fan e ‘d chité nòstri pecà, përchè ch’i podoma saluté con gòj la vnùa ‘d Gesù Crist, nòst Redentor, ch’a viv e regna con Ti e con lë Spìrit Sant, ora e për sèmper. Amen.
Mùsiche ch’i l’oma dovrà
- Tut mir auf die schoene Pforte (Joachim Neander), Genesis Brass
- Canticle of Zachary (Instrumental Songs Music)
- Suite de Danses – IV. Courante (M. Pretorius), Munchner Posaunenquartett
- Lob und Preis (Christian Sprenger), Genesis Brass
- May the Circle Be Unbroken (Beltway Brass Quintett)
- Wunderbarer Koenig (J. Neander), Genesis Brass
- Fugue in C Minor (J. S. Bach), Boston Brass
Leave a Reply