Provèrbi

18

¹Chi ch’a veul stess-ne për sò cont e a dëspressia j’avìs ch’a-j darìo j’àutri^[1] a l’é mach n’egoista.

²Al fabiòch a-j pias nen la prudensa ma a fà mach tut lòn ch’a-j passa për la testa^[2].

³Quand ch’a riva chi dëspressia Nosgnor^[3], a-j ven ansema ‘dcò lë dzonor e pej a-i ven ëdcò l’ònta e con chila a riva ‘l rimpròcc.

⁴Le paròle dla boca dl’òm a son d’eve ‘d cole përfonde, la sorgiss ëd la saviëssa a l’é parèj d’un arian ch’a debòrda.

⁵A lé pa bin, ant ij tribunaj, pìé le part dij potent e feje tòrt ai giust

⁶Le paròle dij fabiòch a son càusa mach ëd ruse e a anvito le patele.

⁷Ël beté a l’ha na bocassa ch’a lo manda an ruin-a e as antrapa da chiel medésim.

⁸Ij petegolam a son parèj ëd ròba dossa ch’as mangia volenté, ma a finisso për fene avèj ël mal ëd pansa.

⁹Chi ch’a l’é gargh ant ël travajé a l’é frel ëd lë sgheiré.

¹⁰Ël nòm ëd Nosgnor a l’é parèj ëd na fortëssa, la përson-a divòta a-i cor për trovene n’arpar sicur.

¹¹Jë sgnor a chërdo che soe richësse a sìo soa fòrsa ‘d lor, as imàgino ch’a sìo coma n’àuta muraja ch’a-j guerna da tùit ij sagrin.

¹²La supèrbia a marcia anans ëd la ruin-a, ma darera dl’umiltà a-i ven l’onor.

¹³Chi a réplica anans ch’a l’àbia bin ëscotà a fà mostra d’esse ‘n fòl sensa vërgògna.

¹⁴L’òm a l’é sostnù ant la maladia da sò spìrit, ma n’ànim crasà chi che a lo arviscolerà?

¹⁵Ël cheur ëd l’òm ëd sust a dimostra d’avèj ëd siensa, soe orije ason doverte për arsèive ‘d conossensa.

¹⁶Don e cadò a doverto tute le pòrte e fin-a la gent ch’a conta a riveriss chi ch’a-j fà.

¹⁷Ël prim a parlé ant na càusa an tribunal a smija sempre ch’a l’abia rason, ma quand che ij sò aversari a pijo la paròla a l’é tuta n’àutra stòria.

¹⁸Tiré a sòrt a fà chité le discussion e a decid an tra le ruse dij potent.

¹⁹Un frel^[4] ofèis a l’é pì dur da conquistesse che na sità fortificà; le ruse a separo d’amis pì che ‘d pòrte sarà con bare.

²⁰Con ël frut ëd soa boca l’òm as ampiniss la pansa; chiel as arpata dij prodòt dij sò làver.

²¹La mòrt e la vita a son an podèj ëd la lenga, e col ch’a-j pias ëd dovrela a na mangiarà ij frut.

²²Trové na brava fomna a l’é coma trové ‘l boneur; a l’é arsèive da Nosgnor un bel cadò.

²³Na përson-a pòvra a sùplica con umiltà, ma në sgnor a rëspond con arogansa.

²⁴A-i é “d’amis” ch’a a son pront a fesse a tòch l’un con l’àutr, ma n’amìs génit at ëstà tacà pì che ‘n frel.

As podrìa ‘dcò voltesse con ”a serca soa ocasion”: לְתֹאֲנָה (ltoʾanah) nopà ‘d לְתַאֲוָה (ltaʾavah).
O “lòn ch’a l’ha ant ël cheur”.
O “l’empi”.
O “n’amis”.